وقالت

وقالت

عارفة عاتقولى

بإنك م الحنان محروم

و شايل فوق كتاف الصبر

تل هموم

و بإيديك اللى شقيانة فى ليل غربة

عاينعق فوق حيطانه البوم

قلعت القلب من جدماره و رميته

فى بير نسيان

و لو مرة عاتتصنع عشان راجل

تكون تقلان

ما برضه قالوها فى الأمثال قبلينا

أهالى زمان

يا ريّسنا بلاش تتقل

و خف تعوم

ما أنا زيّك

و يمكن حالى فى غيابك

يكون أسخم و طعم اللقمة من غيرك أمر كتير من العلقم

لكن رابطة حبال الصبر فى لسانى

وما اتكلمش

وقلبى فى غربتك سهران

وعمره ما نامش

وبعد ما جيتنى عاتزعّق

تقولى أنا هامش

خلاص أمشى

وهمّلنا

وقول للولد ما يزنّوش على دماغى بسؤال

ما أعرفش ليه مردود

أبويا ميته عايعاود ؟؟

ترد دموع عاتتعلق

فى حافة الرمش

دا باين قلبه من يمّتنا نام ولا قامش

يا ولد الناس أنا خابراك

يمين بالله أنا عاذراك

لكن طبعك مغلبنى

ألوم روحى ميتين مرة

وألومك دور

تطيح فيا

تقولى مراعى قربة

وعشرة وأهلية

وأنا فينى ؟؟

ما فيش خاطر فى يوم ليا ؟؟

لكن معلهش

أنا سيباك على راحتك

عشان لو ع الكعوب لفيت

سنين وسنين

ماتلقاش واحدة تتحمل أذاك غيرى

عشان عايزاك

دا آخر قولى

يا زهيرى

أخى الفاضل والمبدع الرائع جابر الزهيرى

أنا شايفها ع تعاتب
ومستنية ع العاتب
تهل وتلمحك عينها
تشيل عنها هموم الولد
وتعينها
عشان البيت
بدون راجل
أكيد ناقص

ومادام يا زهيرى قولها عتاب

أكيد تبقوا يا أخويا أحباب
ماقايله لك
ملتقاش واحدة تتحمل أذاك غيرى
عشان عايزاك
دا أخر قولها يا زهيرى

بلاش تقل الرجالة وخف تعوم ياعم وارحموا من فى الأرض ..........
هههههههههههه

كلمات لأخى كتبتها من عشمى

تقبل تقديرى لإبداعك الراقى

أخويا وحبيبى جابر الزهيرى

أيه العظمة دى يا كبير

بجد حكاية ومتفرد فيها لما بتصمم على فكرة بتعملها الحمدالله صح جداً

الله أكبر عليك وربنا يحميك

الصديق الصدوق ورفيق الدرب أخويا علاء رزق:

يا عم كبير أيه ؟

الكبير ربنا أنت عارف أن أخوك بيكتب أحساسه ونجاح القصيدة أو عدمه من الله

وعلى العموم ياما سمعت وياما هاتسمع ممكن تخلى المجاملات دى لقصيدة أخوك يكون راضى

عنها لإنى يا علاء لغاية دلوقتى مش راضى على شغلى

مش هاشكرك لأن الكلام ده مش بينا

أخوك جابر الزهيرى

اخي الأستاذ الكبير جابر الزهيري

دي حاجه ياعم بيناتكم تقولهاليه

مشاعر كلها عذوبه اقول انا ايه

انت كما عودتنامبدع...

مبروك علينا هذا المنتدي الجميل

دمت لنا اخ وصديق

اخوك...ابا سرحه

الشاعرة المتميزة رشا فؤاد :

ما تتغريش فى قولها كتير

دانا اللى حدايا سر فى بير

ما يعرفهوش بشر غيرى

وانا ساكت ومتحمل عشان الولد

دول شايلين فى أساميهم أزاهيرى

دايماً الست تحب تبان مظلومة لكن على مين

ههههههههههههههههه

تقبلى تقديرى

وشكراً لتواصلك

أخوكى جابر الزهيرى

الشاعر الكبير يسرى حنفى :

يعنى انا قلت لحد غريب

ما إنت أخويا وأخوها وبشهدك عليها

إن كان يرضيك يا أبو حنفى قول لى

ههههههههه

مبروك عليك بيتك

أخويا الشاعر الرائع جابر الزهيرى

الحقيقة مش عارفة أقول أيه

رائع كلمة قليلة جداً على أبداعك

نفسى أعرف الشعر والأحساس العالى بيجيلكوا أزاى

دمت مبدعاً أخى جابر

الأخت العزيزة شيماء فؤاد
اهلاً بيكى معانا سعيد جداً بتعليقك وبدخولك فى المنتدى وأرى فيكى الموهبة من خلال ما تكتبين من خواطر

أدام الله أخوتنا ومنتظرين إبداعك

الأخت العزيزة أميرة البدرى

أحد أفراد عصابة الزهيرى

شكراً لكلامك الجميل ومجاملتك الرائعة

فأنتى نعم الأخت التى نفخر بها بيننا