خد راحتك

--------------------------------------------------------------------------------

تشوفك عينى

ترتاح لك

تهجر سنين الهم

و تروح لك

و تتخبى ف ننى عنييك

و أندهلك

وأتنهد

وأنا قدام عينيك واقف.....

على كيفك

وخد راحتك

تهون الدنيا بشقاها

وتتبقى ف أيامى

شقاوة عمرى فيك إنت

وتهدى

ف لمسة إيدى

على شعرك

تقوم واقف

تقول فارس

تقوم حارس

لغدر زمانى

و أيامى.....

على كيفك وخد راحتك

يا ضحكة حلوة ف أيامى

يا دمعه دافية فوق خدودى

يا حلم صباى و شبابى

أتنهد

و قولى كلام

وخلى عينيه ساكنه عينيك

ما أنت نظرتى ف بكرة

و إنت كلمتى الحرة

وعكاز دنيتى المرة

لسان يرمى سلامى لأحبابى

وفاتح للديار بابى

أمدلك سلام إيدى

تبوس ف الكف وف ضهره

وفوق ظهرى

بتتتنط ولا يكفيك

غير رميتك

جوه هنا ف حضنى

تشيل أوهام

و أتسند على أكتافك

و حملى عليك......

على كيفك

وخد راحتك

تعلى الصوت

وتعمل كل ما بدالك

تجرى

تلعب

وتقلب

كل شيىء تلقاه قدامك

على أقدامك و تلمحنى

تطاطى الراس

قدامى
ولو سيبتك

تعود تانى

تعلى الصوت

على أخواتك

يا أغلى عندهم منى

يا روحى و بسمتى و ننى

معايا أمانة جوايا

باقيلى أيام أنا ف عمرى

أنا ليك جاى بأهديها تعيش بيها

تشوف البسمة مرسومة

على أخواتك

ف دقة إيدك النسمة

على بابهم

هنا ف حضنك

تتوه الآه

وتتنور

بتنهيدة

بنهديلك

عنينا تشوف

بحور الدمع ف خدودنا

على عينك

على كيفك

وخد راحتك

بنرتاح لك

ما هو إنت دفانا

ولحافنا

نشيلك شيل على أكتافنا

يا شايل رسم أوصافنا

تغيب عنا!

تغيب الروح ما ترجعلى

و ترجع لي

ينور دارى بالضحكة

تحسس جارى بالفرحة

تعلى الصوت

تعود تانى الحياة ليه

على عندك

أنا عندك

رسالة تقرا ما فيها

تقر إنك نسيم الروح

ما أنا ف الننى قدامك

ولا تطاطى على أقدامك

أنا ف الكون دا خدامك

وأتباهى بكونك ولدنا الغالى

ف حاول يا أبنى توصلها

وإياك يوم تغيرها

على كيفك

الشاعر الكبير والمبدع علاء رزق :
لك منى كل التقدير على رائعتك أد أية إبداع راقى ومضمون رائع والقصيدة مستنى جداً لما بها من عمق فى التعبير والمعنى تصور مشاعرك النبيلة أتجاه ولدك يا لها من رائعة
تحياتى لأبداعك الراقى

أختنا العزيزة والشاعرة المتميزة رشا فؤاد

والله مش عارف أقولك أيه بصراحة ما أنتى كنتى معانا فى الحكاببة وعارفة أد أيه الواحد تعب

وكنت متابعة معانا والحقيقة كل أخواتى كانوا محاوطنى ويمكن دا اللى ساعدنى أتحمل الأزمة

لحد ما حلصت متشكر جداً لتعليقك

أخويا العزيز والشاعر الكبير علاء رزق :

فكرتنى بلحظة ولادة هذه القصيدة

تصدق يا علاء إن دموعى نزلت وأنا بمر عليها دلوقتى زى ما بكيت أول ما سمعتها منك ساعة ما كتبتها

ماهو أحمد ابنى زى ماهو ابنك

ربنا يبارك لنا فيه

دايماً كلامك مؤثر و قلبك الطيب بيخلينى ساعات أحاول أكون زيك وأسيب الصلابة والحدة

لكن الطبع يغلب التطبع

إعمل معروف ونزل قصيدة من غزلياتك

وطبعاً كلها فى

مصر

سلام يا صاحبى

أخوك جابر

الأخ العزيز الأستاذ علاءرزق

اماعن القصيده فلا اروع

من حيث التناول والصور

والأهم الأ حساس العالي

دمت ودام ابداعك

اخوك اباسرحه

أخويا وحبيبى جابر الزهيرى

أنت أكتر واحد عارف الظروف الصعبة اللى كتبت فيفها هذه القصيدة لأنك كنت معايا لحظة

بلحظة وفعلاً كانت لحظات صعبة عليه جداً الله لا يعودها تانى

وربنا مايحرمنيش منك

شاعرنا الحبيب يسرى حنفى

والله يا عم منا عارف اقولك أيه

الكلام حلو قوى وأنا معنديش كلام حلو زيه

ع العموم إنت دايماً كده كلامك ملوش حل

ما أنت نظرتى ف بكرة

و إنت كلمتى الحرة

وعكاز دنيتى المرة

الله الله الله
الأستاذ علاء رزق
سعدت جدا بالمرور على قصيدتك التي تحتاج
إلى عودة وعودة
تقبل تحيتي ومودتي

الأخت العزيزة أميرة البدرى

بجد متشكر جداً لروعة مرورك وأدبك العالى فى الرد

وتقديرك للنص ومعانيه صحيح أخويا جابر إختار فرد متميز يثرى عصابة الزهيرى

ويجعلها تلمع لعنان السماء

اخويا العزيز الشاعر الرائع حسام خليل

والله العظيم ياعم إنت اللى مرورك يحتاج لالف عودة وعودة من جماله

أنا مش اد الكلام الحلو دا كله

ياعم الحلويات الكتير غلط ولا إنت عايز سنانى تسوس

هههههههههههه

أنا بحبك وعشان كده بحب أهذر معاك

ربنا يخليك ليه