"فلاح - مش- فصيح" -( كاملة)

فلاح -مـــش - فصيح
[
أنا مين أنا ليه أنا كِيف أنا كام؟
أنـــــــا ....واحد هارب م الأحكام
أنا رايـــــح جـــــاي علي الدور
أنا زى الفــــــــــروج المـدوور
أنا بزرع نور وبعيـــش في ضلام

متهــــوم بالجهل وبالأمية
أنا شايل 20 ألف قضية
وعامل زي حديدة الغيط
الكل منفّـض فاســــــه عليه
مع إن حياتي علام ف علام

مركون ع الحيط زي الجزامة
أو زي مهبـــة ف ايد خدامة
مغلولـــــــة وصحتهــا عفية
خلتني ما عارف حسبتي كـــام


ما تسيبني ف حالي الله يخليك
لا نهبت قروض ولا قلت فكيك
ولا ليه ف رشوة ولا ف تسليك
وباعوها ما قلتش بعتو بكــــام

أنا شاري بلادي وعمرى ما بيع
ولا ليه ف سلم ولا ف تطبيع
أنا عندى أموت ف الحرب شجيع
ولا إني أعيش مذلول بســـــــلام

أنا بابني مدن وبنام ع رصـــاف
وبتاكل لحمي وباكل حــــــــــاف
نسّيتي خلاص طعم الانصـــــاف
والعدل في ضلك بقي أوهـــــــــام

من بدري بقوم وبصحِّي الطير
أنا فالح غيطي وبحصد خيـــــر
والخير ع يصبّ ف جيب الغير
وببوس اليد ومرضي بنام

أنا زارع رز وقمح وفــــــــول
وبزود ليكم ف المحصـــــــول
ما أنا بعلف ناس.. وحمير.. وعجول
من هدة حيلى اتعشه وانـــــــام


بســـــأل ع الغايب والعيــــــان
ومربي ولادي علي القــــــرآن
وبفور لو بلدي ف يوم اتهــان
وبأدي المطلوب مني تمــــــام

أنا ماشي ف حالي وجنب الحيط
أنا واحد عادي وشكله بسيــــط
ولا ليه في نط ولا ف تنطيـــط
لا أهنت الدين ولا خدت وســام

ولا بعرف لبس الكرفتــــــــات
الشيك الغالية أم الألوفــــــات
ولا عاندي هامر ولا بودى جاردات
ولا صورى مرطرطة ف الاعلام

الباشا مكدر مني أنا ليــــــــــه؟
وأنا خيري عليه يا سعادة البيه
لو عاوز نحتاسب أوكيه (OK)
مايشوف بقي مين غرقها وعام

من باعها لمين بالطول والعرض
وسمم ناسها وخرب والأرض
وخنث فيها وهتك العــــرض
وخلا النخوة بقت أحـــــــلام

مين خلا حياتنا يابيه ألغــــــــــاز
أنا دايخ ورا انبوب بوتجــــــــــاز
وولاد الكلب بياخدوا الغـــــــــــاز
والداهية السودة بياخدوا بكام؟!!!

مين ودا حديد يبنوبو الســـــــــور؟
مين حاصر حق بأمر الــــــــزور؟
وفتح الخزنة وطفي النور؟
وقال العلـــم حدا العـــــلام

أنا مخي ملان بشكوك وظنون
أما انت ملان أفكار وفنون
ما ترد يا عاقل ع المجنـــــون
دا حلال الذل دا ولا حـــرام

من غيري لا موز ولا جوز ولا تين
ولا كانوا هتبنوا قصور عابدين
طيب والله ، ليوم الديــــــــــــن
من غيرى ما فيه معني لحكام

من غيري الشعب هياكل طوب
لا فواكه فيه ولا حتي حبـــوب
لكن أحوالكـــــم بالشقلــــــوب
هنقول أيه بقي ف اللى اسمه " نظام"


دا انا حتي جميل وبرئ ولذيـــذ
دا انا بفدي بلادى بكـــل عزيـــز
بالرو ح بالدم بالراس وال...غيظ
ان أنا باتعامل أي كــــــــــــــلام

أنا جاهل؟ طيب جاهل ليييييــه؟؟
ابترسم خط أنا بمشي عليـــــــــه
ان تهت معاه أتحاسب ليــــــــــه؟
بالزمة يا باشا دا يبقي كلام؟؟؟؟

عاطف عاشور
[/Ashour1033@yahoo.com