كـوم الـزُهـيـر

كـوم الـزُهـيـر (قصة حياة شاعر )

التوتة رامية غُصنها السارح
نواحي " الشيخ عُمار " فوق قبّته
والنسمة بتلاعب ورقها .. تهدهده
قوم يبتسم ويزيد جمال
وفروعها تحضن بعضها
وإحنا بنعلب تحتها أنا والعيال
ونلم غطيان الكاكولا أمات فِلل
ونروح " لأمين السنكري "
يعمل لنا صفافير صفيح
ونسن في سيوفنا الجريد
علشان حروب
ها تقوم ما بينا وبين عيال
غرب البلد
وندور نلم ف بعضنا
علشان يكون لينا الهجوم
والناس تزيط من غُلبها
ومن الُعُفار
هو انتو ما عدّاش عليكو
ف يوم خِشا
و احنا ولا كنا هنا
والضرب شغال رغم كل التهديدات
ما تقولشى بنحارب يهود

*****
أمّا الحريم
قُدام طرمبة " عبحكيم "
كانوا كل يوم
يتلموا ساعة العصر يحكوا لبعضهم
مرة على جنينة " الضعيف "
وع الدريس اللي جابوه
وملوا به زناقير البيوت
وع الخبيز
وطاحونة " الشيخ إبراهيم "
أو عن ركوبة
حدّ عدّابها و عفاهم
إنها ديك النهار
كان جابها ليه " صابر شُتت "
با تنين جنية
ويقوموا وقت المغربية على اتفاق
إنه اتغلب
من قبل ما الرجالة تيجي من الغيطان
وتطلّع القعدة على عنيهم
نكد

*******

والليل يعتّم كل ضيّ
ونروّح على بيوتنا وفوقينا من الحروب
أكوام تُراب
وآخرها علقة تهمد الجسم العفي
والدمع يغسل وشّنا
والصبح ييجي يلمنا
وسط الغيطان
من بعد ما نروح " العزازنة "
ونصلي ويّا " الشيخ علي "
وهو بيمد الآيات
ونقول آمين
كُنا كمان
بالطوب نحرجم أعلى نخل
وكان يحرجمنا ببلح
ناكل ونرمح ع الطيشان
و يعدي " بكر "
ينادي في ولاد الحلال
عن عنزة بيضة اتسرّبت
أول عشيّة
واللي يلاقيها
ليه حلاوة عشرة صاغ
وندور وراه
و عصايته تجري عشان تفرّق شملنا
ولا أي شئ بيهمنا
وكان همّنا
إن احنا بعد الضهر ها نسمّع
في كُتّاب البلد
والشيخ تشوفه ف قعدته
راكب جَمل
و عصايته ملزوقه ف إيديه
لكنه كان طيّب قوي
وكان يقول : إحفظ يا واد
خليك جَدَع
و بلاش دلع
" عبدايم " اسمه وكان ياخدنا
لمّا نوصل قد سمع
علشان نسمّع في الإدارة
وكان يقول :
اللي يفوز
من جيبي ليه قرشين صحاح

*****

وشهور تمرّ
وسنين تمرّ
ومر ساقياه الطواري لعظمنا
في العصر بعد المدرسة
والصُحبة فرّقها الزمن
ولا عادشِ لعب يلمنا جنب المقام
والتوتة نشفت م الزعل
وقالوا لنا ماتت
أصلها عاشت كتير
شافت موالد الجدود
رقَصت في أفراحهم
تقولشى مُهرة مدربة
وصعب عليّا قطعها
وزرعت غيرها في الملق
ورويتها من عرق الصبا
وحكاوي كان يحكيها لينا
عمِ " قطب "
وكتابي تحت النخلة قاعد
كنت أروح له
وكنّا نحكي لبعضنا
لحد ما يحلّ الغروب
ويجرّ خيط النور وراه
و يروّحُه

*****

وكمان سنين جريت قوام
فيها الغروب كان كل فترة
ييجي يا خد
حد م الصُحبة الجديدة
والشيب عرف سكة دماغي
وزرَعَها حيرة
و كام سؤال
من بعد ما زرعة سنيني فرّعت
بتلات فروع
ماعرفشي ليه
مش لاقي طعم الفرحة
جوّه عينين لعبهم زي ما شفته زمان ؟
والبسمة وقت اللعب
إن كان بتيجي تروح قوام !
حتى الغيطان
رَمحت عليها بيوت كتير
خلّتها تبعد
خلتها ترجع هي والنخل لوَرَا
و القعدة شايها ما عادشِ شاي
طعمه اختفى
فوق الوابور
والناس خلاص
ما عادتشِ فاضية
للقعاد
أو للحكاوي في ضِلْة السَجَر الكبير
أو في العِشش
عمّالة تجري ورا الرغيف
والدِشِ لامم كل عين
جوا القهاوي اللي اتبنت
حتى الشباب
هجّت من الطورية وتعبها
للمدن
وكلامهم اتغيّر قوي
بقى زي ما يكون أصلهم
مش من هنا
الخير كتير
والبركة شحّت في الإيدين
والناس بقت أكتر كتير
من ناس زمان
بس النفوس متغيّرة
ولا حد بينادي الكبير
يابا فلان
يرحم زمان
و ايام زمان
يمكن أنا حاسس كدا
ولا عشان ما فارقتهاش
لكنّي خايف ييجي يوم
وانده لها
ألقى الغروب واخد معاه
أجمل سنين
ناس طيبين
الحِدّة فيها اتشرّبت
بالطيبة والأصل النضيف
ناس فيها خير
خايف في يوم ألقى الغروب
واخد معاه
" كوم الزهير "

الله الله الله الله الله
حقا إنك لرائع
مبدع أستاذى أينما ذهبت وكيفما شئت
دمت جميلا
وأدام الله لك كوم الزهير

كوم الزهير ( جابر الزهيري ) ميت عفيف ( محمد البهنساوي) وكأنك يا اخي تصف حالي تماما وانا أزور قريتي ومسقط راسي نفس الإحداث بالتمام والكمال مع اختلاف الأسماء ..... رائع يا استاذ جابر والله الذي لا إله إلا هو عشت معك هذه القصيدة بكل مشاعري وذكرياتي واتذكر فيها طفولتي نعم خرجت من هذه القرية وأنا في العاشرة من عمري ولكن كيف أنسى أحلي أيام العمر والجميل فيك يا استاذ جابر أنك لم تترك شاردة أو وارده ولولا فارق الســـــن بيننا كنت شكيت انك عشت هذه الفترة معي في قريتى وعشت معى في زيارتي لها بعد المشيب
أستاذ / جابر اسمحي لي أن أضع على رأسك تاج التميز والآصالة ( شاعر الشعب)
أخوكم / محمد البهنساوي

الشاعر المتميز و الصديق العزيز

أبو عدنان

كلماتك في التعليق أسعدت القلب الذي أحبك في الله

و دعائك الجميل مقبول لأن بظهر الغيب

و لك مثله

ولك تقديري و محبتي و قبلة لعدنان

الزهيري أحلى ورده

أستاذنا الشاعر الكبير

مـــــــــحمد البهنســــــــاوي

كلمات تشعرني و قصيدتي بالخجل و الحياء

و لولا معرفتي العميقة بكم

لقلت مجاملة من أب و أخ و صديق

بارك الله فيكم و ما نحن إلا قطرة من بحركم

الزهيري

الشاعر الرائع والمبدع الجميل
الاستاذ جابر الزهيرى
قصيده بمثابه قصه رائعه
تعايشنا مع احداثها عرضت ببراعه واتقان
واحسست كأنى جوه الحدث وبستمتع بكل
لحظه فيه
اعجبنى جدا توظيفك للغروب
بعده معانى ابدعت فى وصفها
بالاضافه إلى الرساله التى تحملها القصيده
وهو ان كل شئ اتغير مفضلش شئ
زى زمان
رائع كعادتك
تثبت القصيده لروعه المضمون
ولابداع الشاعر
تقبل مرورى وتقديرى

الاستاذ الشاعر الكبير\جابر الزهيري

بسم الله ما شاء الله الروعة لها مبدعين

والابداع له طريق والطريق له عقبات

والعقبات لها حلول والحلول عند الرائع

جابر عبد الرحمن الزهيري أبو ادهم لافض فوك

قصيدة غاية في الروعة عادت بنا الي ايام الصفاء

ودقت ناقوس لما هوا اآت ... أبدعت ايها الرائع

الشاعرة الرائعة / أميرةالبدري

رؤية نقدية تضيف للقصيدة وسعدت بها جداً

موهبة النقد بدأت في الظهور

وعايزة رعاية علشان نكسب ناقدة متميزة

كل الدعاء بالتوفيق

الزهيري تعظيم

صديق العمر الشاعر الكبير

يسري حنفي

الحلو من ذاته زى ما قولت يا أبوسرحة

وأنت أحلى أخلاق في أحلى صديق

ربنا يدوم الحب فيه

قول أمين

هههههههههههه

أخوك أبوأدهم

يلف

اخى الشاعر جابر الزهيرى

ما اجمل كومتك بأحلى ذكريات الطفولة ووصفك

المتميز لها بكل حلوها ومرها هذةالقصيدة

مرجع لابنائك الصغار ليعرفون كم الاصالةوأسس

الريف الجميل وعاداته وتقاليده

كتبت فأبدعت ونرجو المزيد

لك شكرى ومودتى العميقة

أخت الرجال و المبدعة الكبيرة

وفاء أمين

أولاً مبروك منصب المشرف العام

و ثانياً ربنا يبارك لي و للمنتدي في ذوقك و تواصلك الرائع

و أشكر تعليقك الجميل

و في انتظار لملوم عشان لازم ينطخ

هههههههههههههه

أخوكي الزهيري
مبروك

الله عليك
الله عليك
يابن الذينا يا مفترى
الله عليك
باعت بهية
جمال عيونها للجميع
تنسج عليها زهور ربيع
باعت بذمة حسنها
وانت اللى كنت المشترى
..
ريشتك بترسم بالكلام المقتدر
صورة حياتنا
"وقت ما كان فيه حياه"
لعب الغيطان
جري الخلا
والطّبقة في عـز الظلام
والسكنا في حضن الفلا
كان حضن دافي
رغم إنه مالوش دراع
ولا صدر حتى يضمنا
...
كان االهوى داخل صدورنا مع الهوا
رجعتنا لسنييييين ورا
.....
فكرتنا بشقاوة العمر الجميل
اللى صبح من كتر تشويه
الملامح شيء هزيل
وصورة باهتة ف ذكرياتنا كلنا
بتقب فجأة في بحر زحمتنا السفيه
...
اللى صبح والزيف ماليه ..
منظر كريه ...غرّقنا فيه
وسحبنا من نكهة بكارة عمرنا
ودعنا روحنا وزهوها
وصبح ف عينا حلم لا يمكن يكون
وان حتى جانا حيّــنا
يسأل علينا ..يودنا
كل الجيرن _وف بق واحد للأسف _
حيقولوا دول ..... مش من هنا

................
أحييك على هذه اللوحة الجميلة
التي خلدت بها .. (كوم الزهير)
وأعدتنا بها إلي أجمل أيام العمر
التى لا نحس عمق جمالها إلا متأخرين
نحي نصفه الأول.. نرقب نصفه الثاني
يأتي نصفه الثاني ...ننعي نصفه الفاني

تحياتي

عاطف
!!!!

الرائع عاطف عاشور

جاهز في الرد بقصيدة

أكيد كنت من كوم الزهير و عزلت

ههههههههههههه

على فكرة يا عاطف

لو غيرت الأسماء و الأماكن

تلاقي كل واحد يحسها نفسه

لأن الريف و الصعيد المصري واحد

كل تقديري و محبتي

الزهيري

الله الله عليك شاعرنا القدير / جابر الزهيرى

اكيد اعجز بخبرتى البسيطة امام الرد على هذه الرائعه

ولكنى اسجل بكل احترام وتقدير اعجابى وتقديرى لقلمكم الراقى

الأستاذة الشاعرة

بسمة الورد

أشكر مروركم الجميل الذي ما إن يمر على القصيدة

حتى تبتسم لتفتح ورودها

تحياتي و تقديري

الزهيري

أحلى ورده

الشاعر الأستاذ جابر الزهيري

من حظي الجميل أن أكون قد شهدت مولد هذه القصيدة منذ خمس سنوات

و سعادتي اليوم كبيرة إذ رأيتها تضئصفحات المنتدى

و لي عودة بتعليق نقدي إن شاء الله

تقبل تحياتي

د. بيومي
8ف8

الشاعر و الناقد الكبير
د بيومي الشيمي

تعليقك الحلو يا صاحبي نور عندي

و انا في انتظارك من بدرى

يا سبب سعدي

ابعت لي نقد يعلمني

و لا انت يا عم الدكتور

عجبك بعدي

الزهيري

أحلى ورده

المكان نوَّر بوجودك وانا عمري ما كنت بعيد
وفْ قربك يا زهيري دايما باكون مبسوط وسعيد

يا عم زهيرى
تعجز الكلمات
ان توفيك حق
تقبل مرورى

قريب جداً هاتسمعوا خبر جميل

الزهيري

يرحم زمان وليالى زمان ايه ياعم الروعة دى تحياتى

ربنا يبارك لي في مرورك الراقي يا أستاذ حمدي

ان شاء الله قريب نفرح كلنا بخبر كويس

الزهيري

الله عليك ولا تعليق
لأنى والله مانا عارف اقول ايه قدام ابداعك يابو ادهم
كل اللى اقدر اعمله انى أبدى اعجابى الشديد وعجزى عن التعبير امام ماابدعت
تسلم يابو ادهم
وربنا يديم عليك الابداع وحسن البيان
مع ودى
اخوك الاصغر حسن الجمال

الأخ الحبيب حسن الجمال

مرور رائع من أخ فاضل

و ان شاء الله قريب نفرح كلنا بالقصيدة

أخوك جابر

بحمد الله و توفيقه فازت كوم الزهير بالمركز الثالث بمسابقة أخبار الأدب

التي كان موضوعها مظاهر الحياة في الصعيد

و هذا من فضل ربي

تحياتي للجميع

الزهيري