أنا وانا

يا نسمة فى عز الليالى الطويلة

يا شارده يا حيره

ومابيدى حيله

حلمتك ساعاتى

ف أصعب سنينى

تجيلى ف روحى

وتبعد جروحى

ف شرقى وغربى

أدور عليكى

وأسأل واخبط

على كل باب

وأعمل منادى

وانادى بصوتى

وأثبت وجودى

إشارة ف إشارة

بعزم اللى فيه

شرارة المرارة

فحدى اللى فاصل

يعافر واعافر

عشان إنى رافض

يزول اللى فاضل

و ماسك مازورة

وأشوف كام مقاسه

ف نسبة مقاسى

ألاقى النتيجة

ساعات مش فصالحى

حوار جوة ذاتى

وذاتى الحوار

وأخد ف وقتى

كتير م الجدال

وأسرح وافكر

وبعديها أضحك

فرفض اللى فات

وخدنى ف ركابه

وأتعب شويه

واشوف الحياه

واعافر ف جرحى

واشيل التراب

اللى غير ملامحى

تخاف المرارة

ف نسببة وجودها

تشوف هى منى

وانا منها كام

تلاقى مقاسها

بيطلع وينزل

ورافض ثبات

تحاول وتضغط

ف خوفها تموت

عشان عارفة

أنى ف سكنها الحياه

واحس بحوارها

وعجبى الحوار

والاقى عيونى

تنزل ف لولى

بيكتب سطورها

يقول لو تحبى

اللى ساكنه ف روحه

ما كنتى زرعتى

ف جوفه الأنين

ما كنتى حاربتى

الفرح اللى واصل

ماعارف يواصل

ف سيل الدموع

اللى يعصر ف جوفه

يزود ف خوفه

يخاف ع اللى فاضل

ليصبح سراب

ألاقى المرارة

تبلم سكوت

تحاول وتنطق

مفيش ليها منطق

تشاور وترسم

إشارة سماح

هعوض جراح

أقول عايزة أيه

يا قهر السنين

اللى زود ف حملى

يا شيل المواجع

ف قلبى اللى واجع

ورافض ما فيك

يكون جوه منه

فعز الحوار

اللى داير ما بينا

ألاقى المازورة

تقلى برافو

طلعت البريمو

ولا كنت فاكرة

ولا كنت حسه

بإنك تعدى

حصارها ف كيانك

وتلمع عيونى

بلمعة هواصل

واشيل الفواصل

بكلمة هكون

الأستاذه الشاعره رشا فوأد

تحيةتقدير واعجاب بقصيدتك

المعبره والتي نسجتيهاعلي نول

الأبداع وصورتيهابكميراالأحساس

وجملتيهابروعة التسلم والجناس

فخرجت لنامن بحر المتقارب ولاأروع

دمتي ودام ابداعك ..

أستاذى المبدع الرائع يسرى حنفى

متشكرة جداً بجد مش عارفة أقولك أيه

الكلام ده كتير عليه قوى

ومرورك الرائع ده فرحنى جداً

ربنا يكرمك

سعيدة جداً بتواصلك مع أعمالى

الشاعرة المتميزة رشا فؤاد :
أعرف إنك رسامة وتأكدت فى هذه القصيدة من ذلك فكل الصور الجزئية تجمعت فى

صورة كلية
منقسمة إلى أنا المخاطب وأنا المتكلم والذى يحاول استرداد ما تبقى من أمل

القصيدة ككل لوحة من فن الرسم بالحروف أبدعتها أنامل شاعرة فنانة

وفى رأيى الخاص أنها تستحق التثبيت

كل الود والتقدير

الزهيرى

الله عليكى شاعرتنا الجميله \رشا

كلمات ولا أروع فى المعانى البديعة

تقبلى أحترامى وأعجابى لما تقدمين

الأخت العزيزة والشاعرة المتميزة رشا فؤاد

قصيدة جميلة جداً ومعبرة ولون جديد عليكى وإبداع راقى

بصراحة مش لاقى كلام أقوله

ربنا يكرمك ويزيدك

وتلمع عيونى

بلمعة هواصل

واشيل الفواصل

بكلمة هكون
الله عليكي الله
قصيدة تغوص في أعماق النفس كل صدق
الرائعة رشا فؤاد
شكرا على هذا الإبداع
وذلك الإمتاع

أستاذنا الشاعر والناقد الكبير جابر الزهيرى
أنا أعتبر تعليقك على القصيدة قرأة نقدية مبسطة لأنك وضحت رؤى كتير فعلاً أنا قصدتها فى العمل وده مش غريب على ناقد مثلك

الأخت العزيزة بسمة الورد

بجد متشكرة جداً لرقة كلماتك وأحساسك الجميل

شكراً لجمال مرورك

الأخ العزيز والشاعر الكبير علاء رزق

بجد ميرسى جداً لجمال مرورك وتقديرك الرفيع لى وللقصيدة

فأنت أخ بمعنى الكلمة

أدام الله أخوتنا مدى الحياة

أختى العزيزة أميرة البدرى

دايماً فهمانى وحسه بيه هى فعلاً حوارية مع النفس ويمكن من نعمة ربنا

علينا إننا شعرا بنقدر نعبر عن اللى جوانه غيرنا ما بيقدرس

وبيحسدنا على كده

الحمدالله الذى رزقنى بالشعر وعرفت عن طريقه أختى العزيزة أميرة البدرى

الأستاذ والأخ الفاضل حسام خليل

شاكرة جداً لمرورك الراقى وتقديرك للعمل