غموض النظرة

كتير ياما وبتألم ف جوفى نار

لكن رافض يكون ألمة ف عز نهار

وشريان أيدى متحير

وبيعافر عشان ما يعيش ف وسطيكم

فزاد ألمة مع جارة من الأوتار

ف لحظة جوع ومخلوطة

بدمعة عين ع اللى كان

وكان نوحى ف جفاف ريقى بيكلم

وفية بنزف مع الأحزان

وأشوف الناس قصاد عينى

وعينى ف الدموع تسرح على حالى

ف حافة رمشى تكلم

ألاقى الرمش بيسلم على خدودى

ومش عادى اللى أنا شفتة

وغير حالى من حالى ومليتة

لكنى مفيش على وجعى حنان جانى

ولا عشت الحياة ف طيبة بترعانى

وأتوجع وتتوجع ف جوفى الأه

لا عارفة أرجع ولا أتمنع

من السكة اللى شدانى

وجرانى لأحزانى وخوفى يزيد

تزيد الحيرة ف ودانى مع الهمسات

ألا قى حد قربلى يخاف خوفى يقول ياما

يا ريتنى ماعشت دى اللحظة

اللى كويانى ف الجروح عمرى

وأحس بأنى محبوسة

ف أوضاعى اللى خنقانى

ف سجن كابوس مالو ش أخر

بيحرقنى بنار الغلب

وأتمنى يا ريتنى ما كنت يوم نفسى

اللى أنا شايفاها أدامى

عصير دامى ممر حلقى من جوة

وبدوقة زى ميـّة نار

مفيش غيره

ومغلوبة على أمرى

ف طول الصبر مش قادرة

وناس قادرة وسكاكنها

تقطع كل شىء باقى ف أحساسى

وأية ذمبى دنا حرة

وكنت ف بيتى محفوظة

تقول درة

لكن زمنى مغلبنى

وودانى هنا وجابنى

وزلزل كل خطاوية

على الأسفلت

ف سفلتنى ودشدنى بدون رحمة

ف شوارع ف الطريق زحمة

وأنا شيفانى عصفورة

مفيش ريشة على جسمى

وأنا ف القسمة دى نصين

مليش أختار

وعزة نفسى تمنعنى

ومليش أعذار

حشاى ف نار

عنين الناس بتكوينى

ف تكوينى الضغيف كشة

وخفياه جوة توب أسود مغطينى

عشان حرة

ومأسورة ف أسى ضعفى

وغيرة وغيرة قربلى

وف النظرات حكاوى كتير

بتلمحنى وبلمحها

سهام ع البعد قاتلانى

أحس بعصر أو جاعى

وجسمى ينتفض نفضة

مع رعشة

لخطوة جديدة بتقرب

ألاقى أثنين يبصولى

وجوة البصة ألف سؤال

غريبة ف شكلها يحير

وعايزة أية

غموض م النظرة فعنيها

ملان أسار

نراقب من بعيد لبعيد ونتعرف

وأنا حسة

بكل حوار بيقتلنى

مابين عنيهم بيصولى

وأقول يارب عالم بى

أنا المظلومة فى وضعى

ومش قادرة

وبتحمل على وجعى

عشان نفسى أنى أتعايش

مع الدنيا

وخجلى جوة أحزانى

بيمنعنى أقول الأه

وشعرى م القسى شايب على الحاصل

وأية فاضل

عشان ألحق مبلحقشى

ولما أحس بالفرحة متكملشى

ولما تجينى حنية أوام تمشى

تهد العود وكان ف زمانة متصلب

وفوق أوجاعة

متغلب على اللايمين

ع اللى كانوا يوم فاكرين

بمثل ف القسى محنة

وبتسلى على الأحزان

عشان أوصل

وأنا أصلى

اللى داب أصلى

مابين أوجاعى ونسيتة

مع الحوجة

مع لمحة ف عيون عوجة

ولا عمرى هكون منهم

وأعرف أركب الموجة

نزيفى يزيد

وأنا حسة الجناح مكسور

لحد ما فجأة ف الزحمة

وناس رخمة

وواحدة من زمن تانى

ومعرفهاش

لكن حساها تعرفنى

وف عنيها طريق الشوق

بيتغنى لأحزانى

وع الصفين ورود بيضه

كما الياسمين

وبتدمع ف بسمتها

زمن صافى وبتمناه

تجينى أوام

بكف أيدها بطبطب على كتفى

وقالت حاجة من فضلك لوجة الله

إلى الشاعرة المتميزة رشا فؤاد :
بعد قراءة هذه القصيدة مرات ومرات محاولا إستخراج نثبة الغموض فى هذه النظرة وجدتنى سابحا فى ذلك السرد والحوار الداخلى بين
( الأنا والأنا ) لدرجة توحد الصراع النفسى بين الحفاظ على الكرامة التى تحاول بإستماته مواجهة قسوة المجتمع إلى أن تصل إلى درجة الإقتباس من القرآن الكريم
( تحسبهم الجاهل أغنياء من التعفف ) فعرفت مدى قوة الموهبة لديك من خلال تعدد رؤى الناقد حول النظرة لمن تكون؟
أهى نظرة المجتمع لها أم نظرتها للمجتمع ومن هنا أتضح لى أن الغموض هو سر عبقرية النص
دام تميزك وتألقك
الزهيرى

أول تعليق ليا في أجمل منتدى لازم يكون على أجمل قصيدة لأجمل شاعرة
الشاعرة رشا فؤاد
الله ينور عليكي ويزيدك كمان وكمان
أسعدك الله كما أسعدتينا

الله عليكى رشا

كلماتك غاية فى الابداع
تسلم الايادى غاليتى

الأخت العزيزه رشافوْاد
اولامبروك عليناالمنتدي
اماعن القصيده فقدابدعتي
في الصوروالجمل والكلمات
وركوب بحر الهزج بأقتدار
دامت ابداعتك .....
ولاجل الكلمه امشي بلاد بلادراحه
تعيش الكلمه لماتكون علي الراحه
تقبلي مروري
اباسرحه...

الناقد الأستاذ جابر الزهيرى :
هذه الرؤية المقدمة منكو على قصيدتى بها الكثير من النقد البناء الذى أشكرك عليه وهذا ما كنت أجده فى الورشة الأدبية بنادى أدب منشية ناصر ونادى أدب المطرية وغيرها من المنتديات الراقية التى تمنح المبدع جرعة من النقد تبين له الصواب من الخطأ دون تجريح أو تعالى
شكرا لهذا المرور الذى أسعدنى

أختى أميرة البدرى مش عارفة أقولك أيه أمام جمال كلماتك

ربنال ما يحرمنيش منك وسعيدة جداً بوجودك

بينا يا نوارتنا

:D

الشاعر الخلوق جداً أستاذ حسام خليل

كم أنا سعيدة بتعليقك الرائع والبناء

الذى كنت فى إحتياج إليه من مبدع مثلكم

جزاك الله كل خير على مرورك الرائع

الأخت العزيزة بسمة الورد

كلامك حلو قوى زى الصورة الجميلة الموجودة

جنب أسمك

تسلم أيديكى على الكلام الجميل ده

المبدع الرائع أستاذ يسرىحنفى

بصراحة مش عارفة أقول أيه قصاد تعليقك

الراقى وتهنئتك الرقيقة كل اللى أقدر أقوله

الأخلاق العالية دى مش جديدة عليك

ربنا يحميك ونسعد دايماً بمرورك الجميل

أختى العزيزة رشا

الله عليكى حلو قوى التعبير

غموض النظرة

وكمان النهاية جامدة جداً وقوية

عقبالنا معاكى فى الشعر

أختى العزيزة شيماء فؤاد

كلامك حلو قوى ما أنتى معايا وعارفة الليلة كلها

وكانت عجبالكى جداً ولمستك

شكراً لكلامك الجميل

أستاذى الشاعر المبدع ناصر صلاح

كم أنا شاكرة لمرورك الجميل على القصيدة

والتألق الحقيقى هو ظهورك على صفحتى

دمت ودام تواصلك أيها الرائع

ادينى جيت لى حديكم

طرقت الباب

وسجلت هنا باسمى

ومين اللى يجول اهلا

ده عطرب جانا اهو يا شباب

ولو غاب م الوجود جسمى

هتبقى الزكرى يا احباب


هتروى تجول

بعزب الجول

بان كان هناك شاعر

يشج الصخر بالازمه

ينجب فى على معنا

يكون واعر

وكله حج تسمعها الوف الناس

وترويها لى اولدها

وتسرى الكلمه جيل ورا جيل

وارجع تانى مالاول

وجول يا رشا وهطول

انا جيت لحديكم

ورد وجول

على قصيده بمعنا الجول

حروف زينها بستنها

عبير وزهور

وورد يشوفه اللى ناظرله

بالوانه المزهي كا لبس االحور

تقبلى مرورى ويارب الكلام يتقرءة صح ههههههههههه

حروس عطرب

أتيت متأخرا أعذرني , الشاعرة المبدعة الكبيرة عروس المنتدي رشا , قصيدة تحفه بإحساسها الرقيق الراقي و معناها الجميل الرائع , دمتي لنا مبدعة دائما , خالص تحياتي

الشاعر الفاضل الأستاذ محروس عطرب

كم أنا شاكرة لروعة مرورك

وتعليقك الجميل الذى ينم عن طيب قلبك

أدام الله تواصلك

القاص المبدع شريف العجوز

أولاً أنت لم تأتى متأخراً أبداً فتعليقك أعتز بيه أياً كان وقته لأنك أخ فاضل

خلوق مبدع ولك فكرك ورؤيتك الخاصة بك

إذن كيف تأتى متأخراً