قصيدة أيوه بغير للشاعر الجنوبي

أيوة بغير

لا انا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد احسن مني في شيّ
بس بغير

واللي قالولك غيرة الراجل قِلّة ثقة او قلة فَهم
خَلْق حمير

غيرة الراجل نار في مَرَاجِل
نار بتنوّر مابتحرقش
واحنا صعايدة بنستحملش
شمسنا حامية وعِرْقنا حامي وطبعنا حامي
واللي تخلّي صعيدي يحبها
يبقى يا غُلْبها
اصلنا ناس على قد الطيبة
كلنا هيبة
والنسوان في بلادنا جواهر
طب لو عندك حتة ماس
حتخلّيها مداس للناس؟؟
ولا حتقفلي اوضة عليها بميت ترباس
يمكن حتى تأجري ليها جوزين حراس
يبقى انا لا انا جاهل ولا غافل
كل الفرق ما بيني وبينك اني صعيدي
ينعل ابو ده اليوم الاكحل
اللي لا ليه اخر ولا اول
اللي طلعت لقيتني صعيدي

لو كان بايدي
كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟؟ هو انا كلب ؟؟

ثم العبرة ماهيش في اللبس
اصل المشكلة عندك .. عندك ..
قلت حاسيبها وبكرة تحس
بعده تحس
بعده تحس
ده انا لو جبس كنت زعقت
ماشي صداقة وماشي زمالة
بس ماجَتْش على الرجالة

ماهي نسوان الدنيا كتير
وانا ما بقولش تخاصمي الناس
ولا تِتْحِجبي عن الرجالة
ولا تعتكفي وتسكني دير
بس يا ريت حبة تقدير
اني بحبك
واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير

الشاعر الرائع جدا محمد مديح

أشكرك على هذا المنقول الرائع

جدا للشاعر هشان البخ الذى استمتعت

به كثيرا

دمت بكل خير

الشاعر الجميل محمد مديح

كل بوم اري فيك شيء جديد

ومبدع كا هذا المنقو الرائع

لهشام الجخ الجخ ابداع ولا اروع

ادامه الله عليكما

يثبت العمل لروعة المضمون برافو

بجد انت يا محمد رائع لنقلك لمنقول مدهش بهذا الشكل
هشام الجخ وقصيدته التى تتحدث عن البنية الصعيدية لكل رجل
وغيرته التى هى فعلا تنم عن الحب الصادق
فى هذا هو الصعيدى عندم يحب اوى يغير اوى
شكرا لك على هذا المنقول المتميز يا محمد
تقبل تحياتى

» قصيدة الجمهرة للشاعر ( حامد زيد )
» قصيدة لا تصالح للشاعر أمل دنقل
» قصيدة تلاحى ( للشاعر صبرى الصبرى )
» قصيدة 3 خرفان للشاعر هشام الجخ
» قصيدة مش باقي مني للشاعر جمال بخيت