الابن غير شرعى (لشاعر العامية الكبير أستاذ عادل سند )

قصيدة لشاعر العامية الكبير عادل سند




رغمن سن الحيض

كان لسه بدرى عليه

بس المخاض جالها

والمعجزه حصلت

والرب لما يريد

بتحبل البغله

بس الشرف أغلى

من أى شئ تانى

وغريزه الانثى

مستعجله الخلفه

والعجله من الشيطان

اللى استعانت بيه

وقولنا بكريه

ح تغيب لها شويه

قام كحت الكحه

شفنا الوليد عالآرض

من غير ألم أو نوح

يا رب سبحانك

سحبت روح من روح

رغمنه كان مفطوم

لكن....مالوهش لزوم

انه اتنسب ليها

مالهوش شبه منها

وبعيد قوى عنها

البشره من عنتر

والقوره من قيصر

وعيونه لون كسرى

والبق كليوباترا

وف عجرفه هتلر

والحكمه معدومه

وطباعه مذمومه

زى الشيطان لما

خلاها تتوحم

على صوره العظما

شايلاه وفرحانه

دخلت على قومها

قالوا ف نفس واحد

(انّى لك هذا)

ردت بسخريه

من عند كل الناس

الأخ الفاضل والمبدع الكبير الأستاذ عادل سند :
طيب بالذمة هاقول إيه؟
على رأى عمى عثمان عفيفى الله يرحمه
لما كنت أقول حاجة تعجبه
بس طبعاً أيش جاب لجاب
كان بيقول
أقطع دراعى أنت معلم
ومن كلامك بتعلم
الأقتباس من القرآن وتحوير الرد
فيه حرفية شاعر عبقرى
لأن الطفل مش عيسى
ربنا ياخد هذا الطفل اللى منغص على الدنيا كلها حياتها
قول آمين
أخوك جابر الزهيرى

شكراً لك أختنا رشا على هذا المنقول

أخويا الشاعر الكبير عادل سند

رائع دائماً كما عهدناك إبداع راقى جداً نستفيد منه الكثير

سعدنا بوجود إبداعك بيننا ونسعد أكثر بوجودك أنت

الأخت العزيزة رشا شكراً لكى على نقل هذا الأبداع الراقى جداً

أستاذى الرائع والمبدع الكبير عادل سند

كل حاجة منك حلوة قوى وشعرك ماحصلش

أصل اللى بيطلع من القلب بيخش القلب

دمت ودام إبداعك الراقى